Mae AS Plaid Cymru wedi galw ar bobl i gael eu brechu ar ôl datgelu bod cleifion coronafeirws bellach yn ffurfio'r rhan fwyaf o gleifion gofal dwys ym Mwrdd Iechyd Prifysgol Aneurin Bevan.
Daeth y newyddion, gan ymgynghorydd gofal dwys o fewn y bwrdd iechyd, fod y bwrdd iechyd wedi troi yn statws 'coch' yn seiliedig ar fwy o gleifion Covid mewn gofal dwys na chleifion di-Covid.
Dywedodd Peredur Owen Griffiths AS o Ddwyrain De Cymru: "Rwy'n bryderus o glywed bod Bwrdd Iechyd Prifysgol Aneurin Bevan wedi troi yn statws 'coch' oherwydd cynnydd mewn cleifion Covid difrifol wael. Mae hyn yn dangos bod y feirws ar gynnydd ac yn parhau i fod yn berygl i ni a'n cymunedau.
"Ni allwn fod yn hunanfodlon dros hyn ac rwy'n annog pawb nad ydynt wedi'u brechu eto i gael eu brechu os yw eu hiechyd yn ei ganiatáu. Bydd hyn nid yn unig yn amddiffyn eu hunain ond hefyd y rhai o'u cwmpas. Mae angen cymryd pob gofal rhesymol i atal lledaeniad y feirws er mwyn atal ton arall."
Ychwanegodd Peredur: "Mae Plaid Cymru hefyd wedi ysgrifennu at y Llywodraeth Lafur i weld sut y byddant yn ymateb i'r cynnydd mewn trosglwyddiadau, yn enwedig yn wyneb disgyblion sy'n dychwelyd i'r ysgol yn ystod y dyddiau diwethaf. Bydd cwestiynau difrifol yn cael eu gofyn ar lawr y Senedd pan fydd yn ailagor yr wythnos nesaf."
Os hoffech chi gefnogi Peredur a Plaid Cymru, cliciwch ar y linc yma.
Dangos 1 ymateb