Mae AS Plaid Cymru wedi galw ar y Llywodraeth Lafur i ymyrryd dros waith ffordd dadleuol sydd wedi plagio tref ers blynyddoedd.
Dywedodd Peredur Owen Griffiths AS y dylai'r Llywodraeth yng Nghymru gyfeirio adnoddau i sicrhau eu bod yn cau pen y mwdwl ar y gwaith ffordd Blaenau'r Cymoedd o amgylch Brynmawr a’u bod yn gorffen mewn da bryd ar gyfer y Nadolig. Galwodd hefyd am ddarparu cymorth ariannol i fusnesau sydd wedi cael eu heffeithio gan y gwaith ffordd.
Yn ystod Cwestiynau Busnes yn y Senedd, dywedodd AS Dwyrain De Cymru: "Hoffwn godi mater ar ran trigolion a busnesau yn ardal Brynmawr a thu hwnt, sydd wedi cael eu heffeithio gan y gwaith parhaus ar ffordd Blaenau'r Cymoedd.
"Mae hon wedi bod yn saga hirhoedlog i'r bobl leol gan fod y gwaith wedi llusgo ymlaen ac ymlaen. Yr hyn a addawyd oedd cau'r slipffordd am dri mis wedi'i droi'n 15 mis. Rwy'n falch bod y ffordd ymadael, o ddydd Llun ymlaen, bellach wedi agor rhwng 6 a.m ac 8 p.m, ond mae gwaith i'w wneud o hyd ar y rhan hon o'r ffordd, sydd i lawr i un lôn ar hyn o bryd.
"Mae contractwyr wedi dweud, os gellir dibynnu ar hynny, y bydd yr adran yn cael ei chwblhau rywbryd yr hydref hwn, sy'n dod i ben yn swyddogol lai nag wythnos cyn y Nadolig.
"Mae trigolion a busnesau lleol wedi dioddef yn ddigon hir yn barod; mae llawer o fasnachwyr lleol yn simsanu ar y dibyn. A ellir archwilio mater cymorth busnes? Cyflwynais gwestiynau ysgrifenedig ar y mater, ond nid oedd yr atebion a ddaeth yn ôl yn sylweddol.
"Dywedodd un preswylydd lleol wrthyf yr wythnos hon, 'Rydym wedi bod yn ddigon amyneddgar'. Wrth i gyfnod hanfodol y Nadolig nesáu, a ellir cyfeirio adnoddau hefyd at y rhan hon o'r ffordd, er mwyn sicrhau bod gwaith yn cael ei gwblhau cyn y dyddiad cau ar 20 Rhagfyr, na fydd, os yw'n rhedeg hyd at y dyddiad hwnnw, yn dda i ganol y dref sydd eisoes wedi dioddef digon ac sy'n bwriadu manteisio ar y cyfnod cyn y Nadolig?"
Mewn ymateb, dywedodd y Trefnydd Leslie Griffiths AS: "Rwy'n falch iawn bod y ffordd ymadael wedi agor, a byddaf yn sicr yn gofyn—rwy'n cymryd mai'r Dirprwy Weinidog dros Newid Hinsawdd a'ch atebodd—byddaf yn sicr yn gofyn iddo ailedrych ar eich cwestiynau ysgrifenedig i weld a oes unrhyw wybodaeth bellach y gellir ei rhoi, a sicrwydd i'ch etholwyr."
Os hoffech chi gefnogi Peredur a Plaid Cymru, cliciwch ar y linc yma.
Dangos 1 ymateb