Mae AS Plaid Cymru wedi croesawu cynlluniau i ddiwygio'r dreth gyngor i'w gwneud yn decach i aelwydydd incwm isel.
Dywedodd Peredur Owen Griffiths AS, sy'n cynrychioli rhanbarth Dwyrain De Cymru sydd â rhai o'r taliadau treth gyngor uchaf yn y wlad, ei bod yn "hen bryd ailwampio'r cynllun."
Roedd Peredur yn siarad ar y diwrnod y lansiwyd ymgynghoriad ar y dreth gyngor fel rhan o'r cytundeb cydweithredu a wnaeth Plaid Cymru gyda Llywodraeth Cymru.
Cafodd polisi i wneud y dreth gyngor yn fwy blaengar ei gynnwys ym maniffesto Plaid Cymru ar gyfer etholiadau'r Senedd yn 2016 a 2021. Mae'r blaid wedi dadlau ers tro bod y system bresennol yn rhoi baich rhy drwm ar aelwydydd incwm is, sy'n golygu bod ardaloedd tlotach o Gymru yn cael eu cosbi'n fwy na'r rhannau mwy cefnog o'r wlad.
Bydd yr ymgynghoriad bellach yn para 12 wythnos, gyda newidiadau cychwynnol yn cael eu crybwyll i daliadau'r dreth gyngor yn 2025.
Dywedodd Peredur: "Rwy'n falch iawn ein bod yn cymryd cam yn nes at leddfu baich y dreth gyngor ar aelwydydd incwm isel o'r diwedd. Mae'r sefyllfa bresennol yn annheg ac mae'n hen bryd cyflwyno'r newidiadau hyn y mae Plaid Cymru yn eu cyflwyno.
"Rwy'n obeithiol y bydd yr ymgynghoriad yn arwain at y math o newidiadau yr oeddwn yn sefyll etholiad yn eu cylch, fel ailbrisiad er mwyn cynyddu nifer y bandiau ar ben uchaf y prisiadau tai.
"Bydd hyn yn gwneud y dreth gyngor yn fwy cymesur â gwerth eiddo, sy'n golygu bod y rhai sy'n gallu fforddio talu mwy yn gwneud hynny."
Os hoffech chi gefnogi Peredur a Plaid Cymru, cliciwch ar y linc yma.
Dangos 1 ymateb