Mae Aelod Rhanbarthol o'r Senedd sy'n cynrychioli Blaenau Gwent wedi galw ar y Prif Weinidog i'w gwneud yn haws i drigolion weithredu ar oryrru yn eu cymunedau.
Dywedodd Peredur Owen Griffiths AS fod ei brofiad o helpu trigolion Six Bells i geisio atal modurwyr sy'n goryrru wedi dangos y rhwystrau a'r biwrocratiaeth helaeth sy'n atal gweithredu rhagweithiol. Dywedodd wrth y Senedd ei bod yn rhwystredig bod yn rhaid cael marwolaeth neu ddamwain ddifrifol cyn i unrhyw beth gael ei wneud.
Yn ystod Cwestiynau i'r Prif Weinidog, dywedodd Mr Owen Griffiths: "Mae Heddlu Gwent yn cwmpasu rhanbarth Dwyrain De Cymru lle’r wyf yn gynrychioli. Yn ystod y blynyddoedd diwethaf, hwy oedd yr unig heddlu i gofnodi cynnydd mewn damweiniau traffig ar y ffyrdd.
"Wrth edrych yn fanylach ar y ffigurau hyn maent yn dangos bod digwyddiadau lle cafodd rhywun ei anafu'n ddifrifol wedi mwy na dyblu o 82 yn 2015 i 179 yn 2019.
"Rwyf wedi bod yn rhan o ymgyrch lleihau cyflymder ar strydoedd Six Bells ym Mlaenau Gwent; os na wneir rhywbeth yn fuan, mae preswylwyr yn poeni y bydd rhywun yn cael ei anafu'n ddifrifol cyn bo hir.
"Un o'r rhwystrau i gyflwyno mesurau gostegu traffig yw nad yw digwyddiad difrifol wedi digwydd eto. Dylem allu gweithredu cyn i rywun farw.
"Beth all Llywodraeth Cymru ei wneud i symleiddio'r broses i alluogi cymunedau fel Six Bells i gael mwy o reolaeth dros y mesurau gostegu traffig ar eu strydoedd?"
Mewn ymateb, atebodd y Prif Weinidog fod ffordd sefydledig o benderfynu ar ddiogelwch ar y ffyrdd ac ni roddodd unrhyw arwydd y byddai hyn yn newid.
Os hoffech chi gefnogi Peredur a Plaid Cymru, cliciwch ar y linc yma.
Dangos 1 ymateb