Gofynnwyd i AS Dwyrain De Cymru, Peredur Owen Griffiths beth fyddai bwysicaf iddo ar ddiwedd ei oes, wrth iddo gwrdd â staff Marie Curie yn y Senedd, a siaradodd am bwysigrwydd gofal lliniarol a gofal diwedd oes da, a mynediad at hyn i bawb.
Ymunodd Peredur â thîm Polisi Marie Curie Cymru, Lowri Griffiths a Bethan Edwards mewn stondin yn y Senedd ym Mae Caerdydd ddydd Mercher 3 Tachwedd, i dynnu sylw at waith yr elusen diwedd oes.
Mae Marie Curie Cymru yn darparu gofal a chymorth i bobl sy'n byw gyda salwch terfynol a'u hanwyliaid yn eu hosbis a chartrefi pobl. Mae'r elusen hefyd yn cynnig llinell Gwybodaeth a Chymorth am ddim, sy'n cynnwys cymorth profedigaeth. Dyma'r ariannwr elusennol mwyaf o ymchwil gofal lliniarol a gofal diwedd oes yn y DU sydd hefyd yn ymgyrchu dros well gofal diwedd oes i bawb.
Yn ogystal â rhoi benthyg ei gefnogaeth, mae Peredur hefyd yn annog pobl ar draws Dwyrain De Cymru i ddechrau paratoi ar gyfer Diwrnod Cenedlaethol Myfyrio 2022 drwy blannu bylbiau a hadau'r gwanwyn yr hydref hwn. Bydd y blodau'n blodeuo mewn pryd ar gyfer y diwrnod ar 23 Mawrth 2022 mewn arwydd o obaith ar gyfer dyfodol mwy disglair.
Mae'r Diwrnod Cenedlaethol o Fyfyrio yn ddiwrnod i gefnogi'r miliynau o bobl sydd wedi cael profedigaeth yn ystod y pandemig, ac i fyfyrio ar fywydau teulu, ffrindiau, cymdogion a chydweithwyr sydd wedi marw o Covid neu achosion eraill. Mae'r diwrnod yn amser i oedi, myfyrio a chefnogi ei gilydd boed hynny o bob cred neu ddim.
Dywedodd Peredur: "Mae siarad am ein dymuniadau gofal diwedd oes gyda'n hanwyliaid mor bwysig i sicrhau eu bod yn gwybod sut i'n cefnogi orau ar ein hamser mwyaf bregus, a byddwn yn annog pawb i gael y sgwrs honno cyn gynted ag y gallant.
"Yr wyf hefyd yn gobeithio y bydd pobl ar draws Dwyrain De Cymru, waeth beth fo maint eu gofod tu allan, a hyd yn oed y tu mewn, yn plannu Bwlb Gwanwyn ar gyfer Diwrnod Cenedlaethol Myfyrio ac yn cefnogi Marie Curie.
"Mae wedi bod yn gyfnod anodd, gyda llawer wedi'u distrywio gan farwolaeth anwyliaid, bydd plannu'r bylbiau hyn a gweld y twf cyntaf yn torri trwyddo yn gallu adfer ein gobaith am amseroedd gwell i ddod."
Ychwanegodd Lowri Griffiths, Pennaeth Polisi a Materion Cyhoeddus Cymru, ar ran Marie Curie: "Mae cael cefnogaeth Peredur yn gwneud gwahaniaeth enfawr i Marie Curie. Gyda'i help, gallwn godi ymwybyddiaeth am yr hyn rydym yn ei wneud a chyrraedd mwy o bobl sydd ein hangen ac annog mwy o sgyrsiau ynghylch gofal diwedd oes, sydd ei angen nawr yn fwy nag erioed.
"I lawer, mae'r trawma dwfn o golli anwyliaid yn ystod Covid yn dal i fod yn real iawn. Bydd y Diwrnod Cenedlaethol Myfyrio ar 23 Mawrth 2022 yn gyfle i ddod at ei gilydd i gefnogi'r miliynau o bobl sydd mewn profedigaeth yn ystod y pandemig a chofio'r bobl rydym wedi'u colli."
I gael rhagor o wybodaeth ac i addo cymryd rhan yn Niwrnod Cenedlaethol Myfyrio 2022 ewch i www.mariecurie.org.uk/dayofreflection
Dangos 1 ymateb