Mae Peredur Owen Griffiths o Blaid Cymru wedi galw ar y Llywodraeth Lafur i wneud tro pedol ar ôl iddyn nhw bleidleisio i beidio cynnig tâl gwell i nyrsys.
Roedd yr Aelod o'r Senedd dros Ddwyrain De Cymru yn siarad ar ôl cymryd rhan mewn dadl gan Blaid Cymru yn galw am well tâl i nyrsys sydd ar hyn o bryd wedi pleidleisio i streicio ym mhob ardal bwrdd iechyd ond un yn y wlad.
Yn ystod y ddadl, canolbwyntiodd Peredur ar yr effaith y mae lefelau nyrsio anniogel wedi'i chael ar nyrsio yn y ddwy hosbis blant yng Nghymru; Tŷ Hafan a Tŷ Gobaith.
Yn ystod y ddadl, dywedodd: "Mae'r cysylltiad rhwng gofal gwych a nyrsys profiadol wedi’i dderbyn fel ffaith, ac eto mae'r prinder presennol o staff nyrsio yng Nghymru yn effeithio'n ddifrifol ar allu'r hosbisau i ddarparu'r lefel o ofal a chefnogaeth yr hoffen nhw ei ddarparu i gymaint o deuluoedd.
"Os yw'r cyfraddau gostyngol presennol yn parhau, mae'n bosib tybio na fydd yr hosbisau'n gallu gweithredu.
"Yn unol â'u nod datganedig o fod yn wlad dosturiol, dylai Llywodraeth Cymru gefnogi'r sector hosbisau, yn benodol y nyrsys sy'n creu eu hasgwn cefn, ac mae'n rhaid i'r gefnogaeth hon ddechrau gyda chodiad cyflog uwch na chwyddiant."
Ar ôl y ddadl, dywedodd Peredur: "Efallai fod Llafur yn pleidleisio yn erbyn gwell tâl i nyrsys yn synnu rhai pobl ond mae'n arwydd o'r ffordd y maent wedi trin y proffesiwn yn ystod yr ychydig fisoedd diwethaf.
"Ychydig o ymgysylltu sydd wedi bod gan y llywodraeth gyda'r undebau nyrsio dros yr angen brys am becyn tâl.
"Mae hyn wedi arwain at sefyllfa sy'n dirywio lle mae mwyafrif llethol o nyrsys wedi cael digon ac wedi nodi eu bwriad i fynd ar streic."
Ychwanegodd Peredur: "Mae Plaid Cymru yn llwyr y tu ôl i'r nyrsys a'u galwadau am godiad cyflog teilwng.
"Dyw'r Llywodraeth Lafur ddim wedi trin nyrsys gyda'r parch a'r urddas maen nhw'n ei haeddu. Mae amser o hyd iddyn nhw wneud tro pedol ar hyn, a stopio'r ecsodus o nyrsys gweithgar ac ymroddedig trwy roi codiad cyflog iddynt."
Os hoffech chi gefnogi Peredur a Plaid Cymru, cliciwch ar y linc yma.
Dangos 1 ymateb