Mae AS Plaid Cymru wedi galw cynlluniau'r Llywodraeth Dorïaidd i leihau'r cynnydd i Gredyd Cynhwysol fel un "creulon ac anghyfiawn."
Dywedodd Peredur Owen Griffiths, sy'n cynrychioli rhai o'r cymunedau mwyaf difreintiedig yn y wlad yn ei ranbarth yn Nwyrain De Cymru, na ddylai'r Torïaid leihau Credyd Cynhwysol na Chredydau Treth Gwaith os oedd ganddyn nhw unrhyw dosturi.
Yn gynharach eleni cyhoeddodd y Canghellor y byddai'r cynnydd o £20 yn cael ei dorri o Hydref 6ed i'w lefel flaenorol. Cyhoeddodd hefyd y byddai'r cynnydd ar gyfer Credydau Treth Gwaith yn dod i ben ar 6 Ebrill 2021 gyda hawlwyr yn derbyn taliad un tro o £500 yn lle hynny.
Daeth galwadau Peredur wrth i adroddiad gan Sefydliad Bevan ddangos y bydd Cymru'n cael ei tharo'n anghymesur gan y newidiadau. Maent yn amcangyfrif y bydd y toriadau i Gredyd Cynhwysol a Chredyd Treth Gwaith yn diddymu £286 miliwn oddi ar deuluoedd incwm isel yng Nghymru bob blwyddyn.
Dywedodd ymchwilwyr hefyd y bydd y toriad i Gredyd Cynhwysol yn cael effaith ar gymunedau ledled Cymru gyda mwy na thraean o deuluoedd â phlant yr effeithir arnynt ym mhob etholaeth ond pedair. Yn etholaethau Blaenau Gwent a Merthyr Tudful a Rhymni, mae 48% o deuluoedd â phlant yn derbyn Credyd Cynhwysol neu Gredyd Treth Gwaith. Yn Nhorfaen, y ffigur yw 49%.
Dywedodd Peredur: "Mae llawer o gyllidebau cartrefi wedi bod dan straen oherwydd effaith coronafeirws. Yr oedd gennym eisoes lefelau uchel o dlodi a thlodi plant yng Nghymru a bydd hyn wedi'i waethygu gan y digwyddiadau digynsail a sbardunwyd gan y pandemig.
"Mae llawer o deuluoedd eisoes yn byw o dan neu ar ffin tlodi felly er mwyn i'r Llywodraeth Dorïaidd gael gwared ar y codiad Credyd Cynhwysol yn greulon ac anghyfiawn. Mae'n dangos eu bod yn gwbl ddi-hid i anghenion pobl yng Nghymru, y mae llawer ohonynt yn wynebu ymdrech ddyddiol i gael dau ben llinyn ynghyd.
"Os oes ganddynt unrhyw dosturi, byddant yn cyhoeddi tro pedol cyflym gyda'r polisi hwn ac yn cynnal y cynnydd sydd wedi bod yn achubiaeth i gynifer. Os na fyddant yn gwneud hyn, ni fydd llawer o bobl yng Nghymru yn maddau nac yn anghofio."
Os hoffech chi gefnogi Peredur a Plaid Cymru, cliciwch ar y linc yma.
Dangos 1 ymateb